مسؤول عربي

علاش العربي كي يتحمل مسؤولية أي إدارة يسعى لخرابها و ما يحاولش يصلح؟ الشي هذا ريتو في برشة بقايع في إداراتنا التونسية و بالطبيعة هذا شي مش جديد علينا الكل أما حبيت نعرف السبب من عند ناس عاقلين فقط. في كلية الأداب بسوسة جابولنا رئيس قسم جديد لا عندو منطق و لا جواب و ما يحكي كان بالعشرة وافي و كل شي عندو غامض و لو تسأل الإدارة عن أي إجراء جديد تقللك أسأل سيدنا السردوك و كي تسألو يقول ما نعرفش. زعمة علاش؟

الصحبة صحبة و النية ما ثماش

من أقسى و أمر أنواع الغربة التي يعيشها الإنسان تكون عندما يحس أنه كائن غريب في عالمه و أنه أيضا مجرد جسد يحتك بالآخرين في حياتهم اليومية بينما تعيش الأرواح في غربة مريرة. اليوم فاجأني أمر هام عندما تحدثنا عن الصداقة و هو غياب الصحبة أو ندرتها و أصبح إنسان عصر الحداثة يفرح كثيرا عندما يلتقي بصديق وفي و الأمر أشبه بحالة التائه العطشان في صحراء مقفرة و أكثر ما يفرحه قطرات ماء عذب تروي عطشه و تعيد إليه الحياة من جديد و الصديق الصادق هو ذلك الماء العذب الذي ينتشل النفس من غربتها. اليوم سمعت غرائب عديدة مثل أن صديقين بلغ عمر صداقتهما 17 عاما و لكنها سرعان ما تبددت و تبخرت لأن أحد الأصدقاء أحس بأن صديقه غير مشرف، هو غير مشرف لأنه ليس من رواد الخمارات و هو غير مشرف لأنه يحب حياة البسطاء و لا يرتاح إلا عندما يجالسهم في مقاهيهم البسيطة التي تضفي حلاوة على النفس أكثر من حلاوة السكر عندما يذوب في كأس القهوة. صديقة أخرى اكتشفت من بعد 5 سنين أنها أخطأت في اختيار الصديقة المفضلة و أتساءل هل نحتاج لخمس سنوات حتى نفهم بعضنا أم أن العيب في أنفسنا أم في المتغيرات التي تحاصرنا دائما و التي تحتم وجودها علينا راغبين أو كارهين؟ بالفعل اليوم نحتاج لإعادة ترتيب أوراقنا من جديد و بجدية لأنه بمجرد أن يخرج المرء من محيطه الأسري لابد أن ينشئ أسرة جديدة تتكون من أصدقاء جديرين بالمحبة و الثقة كما يجب أن يكون الواحد منا صبورا مع أصدقائه و بالصبر على بعضنا نتدارك أخطاءنا لأن الصحبة الطيبة ليست فانوسا سحريا يلبي طلباتنا بلمسة واحدة

فرشان الحصاير

السلام عليكم يا جماعة الخير. بصراحة رات عيني ما رات و ما راتشي رقع كيما هالمجتمع إلي عايشين فيه و هو باختصار مجتمع يغطي ع الخير و بللي الواحد يجري و يجري يبقى مكروه و الناس مش مهضمينو بلغة القازوز و زيد الخير الكل يبقى محقور و لكن يا دوب وخينا يعمل غلطة بسيطة تو تشوف العباد كيفاش تتعامل معاه. أولا الفضيحة و مهما تستر على فلان لازم يجي علان و يفضحو و ثانيا بقدر ما تكون الغلطة تافهة قد ما تكون الفضيحة أكبر على خاطر إلي يغلط غلطة كبيرة و يطيح فم واحد - حاشاكم - هذاكة سيد الرجال و صيد من ظهر و آه يا زوالي يا مسكين كان تغلط وسط الذيوبة. لتو مانيش فاهم هالمجتمع و صدقوني راني نحب واحد عاقل و رزين يفسرلي تفسير علمي لظاهرة الفضايح و الشمايت بصيفة خاصة

الموت و حوايج أخرى

السلام عليكم يا جماعة. في التدوينة هاذي مانيش باش ننكد عليكم أما أكثر ما نتمنى منكم هو باش تواسيوني و تنسيوني في هموم و نفاق المجتمع إلي عايشين فيه. إذا نحب حاجة في الموت نحب كونو الحاجة الوحيدة إلي تساوي بين الناس و كيف البم بم كيف الزوالي كلهم كفن أبيض و حفرة تحت التراب في الظلمة و الدود و لكن وليت نتهرب من مناسبات الموت في مجتمعنا على خاطرها ولّات مناسبات نتسابقوا فيها للنفاق و الكذب. شدوا عندكم أول حاجة كي يموت الإنسان إلي قهر أحبابو و جيرانو يولي وقتها سيد الناس و أغلى الغوالي و إلي عملوا الكل حكمة ربانية على خاطر أحنا ناس لازمنا العصا و إلي يفكلنا اللقمة من أفامنا و سيدنا و سيد سيدنا هو إلي يبكيك و يقهرك و لكن كي يموت لازمك تسكر فمك و تقول ما أحلاه و والله كان ناس طيبة ما صاب كان عاش أكثر باش يعذبنا و تلقى نفس البشر إلي كان يسحسح فيه بالدعاء أكثر واحد تلقاه يعدد في مناقب الميت و لازمو يرضي المجتمع و لو نفاقا و هذا الكل ما يعنينيش و لكن الرسمي هو إلي صار اليوم. اليوم قمنا الصباح عاملين كيف و حاضرين باش نبداو نهار جديد و كل واحد يتوكل على مولاه باش يعينو و أحنا مازلنا هكاكة يجي تليفون مستعجل و يقول راهو فلان إلي كان يفدلك معاكم البارح راهو توفى و جاتو جلطة و الرجوع لربي، و هذا كلو حق و لا اعتراض عليه و لكن اعتراضي هو أنو السيد هذا مسكين كان زوالي و خبزيست و ما فيه حتى مطموع باش يسلفك الملايين و على هذاكة كان حسب شريعة الزوالي في البلاد محقور و بللي يعمل يبقى قعر و هو وين و الناس فين و نتفكر نهار عمل خطبة بنتو في دار خوه و ولاّت إشاعات و أخبار أنو يطلب في الصدقة و لكن تجري الرياح بما لا تشتهي السفن و يموت هاك السيد و الناس الكل تولي تبكي و تصيح و راهو مات صغير و ما شبعناش بيه و إلي يقول لازمنا نغسلوه مرتين و كان لزم نوضيوه وضوء الصلاة و شي يقول خليه يزيد نهار باش نشبعوا بيه و نشوفوه أكثر و شي يقول لازمو كفن من السعودية - كفن السعودية أكثر حاجة تركبلي لعصب - و إلخ من عبارات لازم و ماصاب و لهنا نتسائل علاش كي الواحد عندو يوميا 24 ساعة من الفرص باش يحب الآخر و يقعد بحذاه و لكن أحنا نتكبروا و نقاطعوا بعضنا و البغض يملى قلوبنا و علاش ما نعرفوا قيمة البشر كان كي يموت و علاش كي يبدا عايش نتمقعروا عليه على خاطرو خبزيست و بسيط و كي يموت يولي ملك الملوك. الله غالب المجتمع متاعنا كرهني في الموت و كرهني باش نمشي لمناسبات العزاء - ربي يطول في أعماركم - و هكة علاش كي كثر النفاق روحت نجري و هربت باش نعمل تدوينة ثماشي ما ننسى

ممنوع الضحك و السان فالنتاين

السلام عليكم يا أهل الخير. ما ننكرش أني في يوم من الأيام كنت من الجماعة إلي هللوا و كبروا و طبلوا و زغردوا فرحا لقدوم القنوات الإسلامية من إقرأ إلى آخر قناة قاعدة في طور الإنشاء و ما ننكرش أني كنت من الجماعة إلي فرحوا برشة على خاطر هالقنوات هاذي نجمت تخلي صفوف الصلاة في الجوامع تكثر و من بعد ما كنا نفرحوا بصفين صلاة في التسعينات ولينا توة أكثر فرحا كي لقينا الصفوف كثرت و المسملين انضبطوا في صلواتهم و هذا كلو من حسنات تلك القنوات إلي لازمنا نعطيوهم حقهم في نجاحهم، و لكن إلي نرفزني من بعد و طلع الدم لراسي كي بدات تلك القنوات تكشف هويتها الحقيقية و هي الحقيقة الوهابية و خاصة أنو الكثير - مش مبالغة مني - من التوانسة كي كانوا ما يصليوش كانوا أكثر عقلا و تفهما و كي صلاوا نقبوا السما بقرونهم و تعداو بحمى الفتاوى و الحلال و الحرام و ما تستغربوش كان يجي اليوم تلقى زوز توانسة في مناظرة فقهية بخصوص البقلاوة مثلا و كونها بدعة أم لا و مانيش قاعد نفدلك على خاطر صارت في الجزاير بلبلة كبيرة كي ثمة جهبذ كبير لا داعي لذكر إسمو قام و قعد و أفتى بحرمة الزلابية و قال هي بدعة و إلي ياكلها يمكن يقعد بين نارين أولهم نار السكر و زرارق الأنسولين و نار جهنم و العياذ بالله. هيا توة قولوا يا نسر هات الصحيح و يزي من التكعرير. الصحيح هو كي تقرا هالأيامات أنو ثمة بعض المسلمين إلي مازالوا يحنوا لعصر الغزوات قاعدين يحضروا لغزوة كبيرة و هي غزوة العداء للفالنتاين و أني متأكد أنو ألف واحد باش يجيبلي أصل وفصل ها السان فالنتاين و كيفاش هو أصلو روماني و شي يقول إغريقي ثم ولّى مسيحي من بعد و لذلك هو حرام باش نحتفلو بيه و آني نقول مش هذاكة بيت القصيد على خاطر مهما كان أصل الحكاية يبقى ثمة إحتمال كبير أنها تكون أسطورة أو عادات شعبية لشعب معين و مادام هي حاجة دنيوية فاش قام نقيموا الدنيا و نقعدوها و نبداو نعاودوا في هاك الفتاوى الصفرا متاع سي ابن عثيمين و ابن الباز و كان هوما ما يعرفوش الحب و ما يحبوش الحب لازمهم ع الأقل يخليوا غيرهم يحب و زيد توة علاش تقللي الورد حرام بينما الورد الورد خلق من خلق ربي الكل و من زينة الحياة الدنيا الحلال و كان ما نهديوش الورد آش شنوة باش نهديوا. يمكن ثمة البعض باش يجيبلي حل إسلامي و يقللي اهدي مصحف و نقللوا هايل و لكن هاو المصاحف مكدسة في الديار و ولات تتحط في تحف البلار و الفضة و مللي كان المصحف كتاب هداية ولّى كتاب هدية و ولات بلاصتو في الخزانة و مش في القلب. يا جماعة إلي ما يحبش الفالنتاين عندو ألف حق على خاطر قناعتو تقللوا تمسك بهويتك و عاداتك و تقاليدك الشعبية و مش لازم تنكد على غيرك و تردهم ولاد حرام و يهود ولاد ألف يهودي و جيب من هاك الصرصوط متاع تهم الخيانة و العمالة على خاطر ها المناسبات هاذي دنيوية لا أكثر و لا أقل. توة نتعداو للضحك و راكم تقولوا اشنية علاقة الضحك بالفالنتاين و نجاوبكم أنو حتى الضحك ولّى في الليستة الكحلة متاع المحرمات الوهابية و السلفية و إلي يضحك راهو قرد و شيطان و يعمل في كبيرة الكبائر و زيد ثمة خبر مفجع و إلا مفزع بلغتنا العربية الفصحى و هو بخصوص هاك الممثل الباكستاني ( الأمزيب مجاهد ) إلي اعتقلوه بعض المتشددين الإسلاميين في بيشاور لمدة شهر كامل و من بعد أطلقوا سراحو من بعد ما تعهد أنو باش يعمل لحية و يبطل الضحك و يعتزل الفن الكوميدي باش يرضى عليه ربي و يتقبلو في أعلى عليين مع النبيين و الشهداء و الصادقين في وقت نعلموا فيه جميعا أن النبي محمد عليه السلام كان بسّاما و كان يداعب أو يمازح أصحابو و لكن هالسلفيين قاعدين يأولوا في الدين على كيفهم و زيد من المخطر جدا أنو يجي مسلم بسيط و يقرأ خبر فاجعة كيمن هذاكة و يجي يحب يقلد المتعصبين السلفيين و يحرم الضحك و تولي التكشيرة دين و الإبتسامة إلحاد. أخيرا مانسش باش نستغرب مثل هالفتاوى القمئة إلي تحرم الفالنتاين و الضحك على خاطر شبعنا ياسر من هاك المناظرات العظمى إلي تناقش في حرمة عيد الشجرة و حرمة عيد الإستقلال و جماعة الوهابية قاعدين يحتلوا في العالم الإسلامي بدولارات النفط و عبر الأثير بينما الغرب قاعدين يتحايلوا كيفاش باش يستقلوا نفطيا عن الوهابيين و قريب ينجحوا في استخراج النفط النظيف من حبوب الذرة و القش و هكاكة لا عزاء للحمقى

مازالت النية

السلام عليكم يا جماعة. أولا ما نحبكمش تقولوا اشبيه هالنسر خرنان و يعاود في الكلام أما اليوم حبيت نكتب في موضوع معاود حكاوا عليه ناس من قبلي و لكن يظهرلي إلي كلامهم مش قاعد يوصل و كيما نعرفوا أحنا معشر التوانسة إلي ما يسمعش لازمنا نهمزوه ثماشي ما يفيق و يتلفتلنا. من غير ما نطول عليكم أما نقوللكم راهو خوكم النسر سبوه و بخسوه - مش بالحق راهو - أما ما تتسبلهوهش و تحسبوه فرخ صغير ترقدو حكاية قبل النوم. الحكاية هي مع جماعة الإيميلات الساذجة متاع أنشرها 11 أو 13 مرة و تو تشوف ألس في بلاد العجائب أو تو تشوف العجب و الطامة الكبرى هي أنو ثمة شباب في ربيع العمر قاعد يصدق في هالخرافات و نزيدكم زيادة قاعد يدافع عليها قال شنوة النية تعيش و اللهم لا عيش إلا عيش السبهللا. توة مش عيب يجيوا شرذمة جهال و يبداوا يلحنوا و يفصلو و يقيسوا على كيف شيطانهم و يقولوا هاو مرة النبي محمد عليه الصلاة و سلم جاهم في المنام - حاشاه بالطبيعة - و قاللهم راهي القيامة قريبة و مرة داوى برشة ناس مرضى و مرة جات السيدة عايشة و داوات طفلة عمرها 12 عام و قالتلها أبعث الرؤيا هاذي 12 مرة و تو تنجح من أول ضربة و كان لزم تو تلقى فاتورة الضو خالصة و صاحب فكرة منام السيدة عايشة ياسر مهف و يعطيه الصحة و قالك مادام سيدنا النبي يجي للرجال في المنام مالا لازم تجي مرتو للنسا في المنام و يا ربي عافينا من شر الإختلاط. بيت القصيد يا جماعة و يا سيادي المثقفين نطلب منكم طلب بسيط و هو أنو كل واحد منا لازمو يتطوع و لو للحظات باش يثقف الناس هاذوما متاع عصابة - أنشر تؤجر - و يقوللهم احشموا على رواحكم و عيشوا الحياة ببساطة و خوذوا بالأسباب و اقراو على رواحكم و إن شاء الله طلبي هذا ما يمشيش بلاش على خاطر عنا رجال تعليم في البلوغ و ينجموا يخصصوا لحظات للأجيال الصاعدة و يفسرولهم قيمة العلم في الحياة و أنو نظرية ( أعمل روحك بهلول تعيش ما عادش توكل كسرى ) و ربي يهدي

خاطرة خرافية

يحكيوا على مواطن ياسر عاقل و متربي حتى كثر على ما وصووه و قعد ضحكة في المجتمع من الحومة لمحطة الكيران للكلية متاعو، و سي خونا المتربي قرر مرة باش يفسد و بدا يلوج ع الحلول العملية و النظريات التجريبية الصادقة لدخول عالم الفساد من أوسع أبوابو و بينما هو يفكر غلبو النوم و جاه أبو الفساد في المنام و أعطاه أمانة كبيرة عبارة على مفتاح مصدد منقوش عليه - لا إلاه إلا الله ، أبو الفساد عدو الله - باش سي العاقل يحل بيبان الفساد و يدخل في هاك العالم المشوم و شاف روحو في مدينة الرذائل و دخل بساقو اليسار و بينما سي العاقل ماشي جاه سي أبو الفساد و قللوا " يعيش ولدي هالمنامة هاذي أمانة في رقبتك و لازمك تبعثها 12 مرة للي تعرفهم و ما تعرفهمش و كان تنسى ما تبعثهمش تو كل شي يطيح في الماء و ترجع لعقوليتك و تمانيك الناس عليك و ما تنساش باش تكتب 12 مرة ( لا إلاه إلا الله، الفاسد عدو الله ). المهم الرسالة تبعثت و طاحت في يدين واحد سارق و نساها لين تاب عليه ربي في أربعة سوايع و رجع الفلوس لأصحابها و طاحت في يدين واحد زبراط و نساها لين تاب عليه ربي و السواك ماعادش يفارق فمو و نفس الرسالة بعثها واحد صادق و في لحظات ولى واحد بلعوط كبير و مش بعيد يجيبوه في التلفزة باش يدافع عن إهمال البلدية و واحد آخر متربي بعث الرسالة و ولى مش متربي. المهم قعدت هاك الرسالة تدور من بوات إيميل لأخرى و الناس تبعث فيها فرحانة و كيما نقولوا في الإنشاء متاع اللإبتدائي ( وعاد فرحا مسرورا ). و ربي يهدي

علاش كي نكذبوا نصدقوا رواحنا؟

السلام عليكم يا أهل الخير. أولا نحب ننوه أنو كي نكتب على غزة الأسيرة مانيش متشمت معاذ الله و لكن نكتب عليها حسب ما فهمتو كمواطن عربي شابع بالكفوف و حامد ربي. الحاصل من غير تكعرير نقول أنو اكتشفت وجود ورم قديم و متجدد و قاعد يكبر في أمتنا العربية و هو ورم الكذب، و صحيح معظم العرب بما فيهم آني مرضى بالكذب أما في الأيامات هاذي كثرنا على ما وصوونا و نبداو من إنتهاء القصف الإسرائيلي الظالم على غزة و إلي يا دوبك وفى منا و الأخت حماس قالت انتصرنا. بالله كيفاش انتصرنا و أحنا مات منا 1330 مواطن بخلاف الجرحى إلي ما يتعدوش من كثرتهم و زيد أضرار القنابل الفسفورية و في المقابل إسرائيل ما مات منها كان 80 مواطن على أقصى تقدير. علاش نكذبوا و نقولوا انتصرنا و علاش ما نعترفوش بالهزيمة ياخي ال1330 قتيل و 5000 جريح ماهمش ناس كيفنا و إلا كيفاش صارت الحكاية، راهي الهزيمة مش عار على خاطرها تنجم تكون درس لينا باش نعاودوا حساباتنا و نفيقوا أنو عدوتنا إسرائيل عندها عتاد حربي اكتسبتوا بالحلال و الحرام و أحنا مازلنا نمجدوا في فوشيك القسام و المقاومة الحقيقية هي مقاومة أهالي غزة و مش مقاومة حماس المتخبية في المغاغر. علاش نكذبوا على رواحنا و نقولوا أنو الرسول الكريم لبس لباس الحرب و ماشي لغزة و في الأخير ثمة 90 بالمية إحتمال أنها كذبة و لكن نصدقوها. علاش نكذبوا و نبعثوا إيميلات لبعضنا باش نعاودوا شوية محفوظات خرافية عشرة مرات و سبحانك يا ربي تو كل شي يتحل و لتو ما صار شي و عاودنا الإيميلات آلاف المرات و زدنا وخرنا لتالي. ثماشي إنسان عاقل يفسرلي علاش كي نكذبوا نصدقوا رواحنا و تلقانا فرحانين بأحوالنا إلي ماشية و تتراجع و إلا نطلعوشي كيما هاك العزوزة إلي هاززها الواد و تزغرد و تقول العام صابة. أفيدوني يفيدكم ربي