آش مدخلك سني ولاّ شيعي

السلام عليكم يا جماعة الخير. من نهار 27 ديسمبر 2008 و خوكم النسر حاير و مش فاهم شي. بالطبيعة إنتوما تتفكروا هاك التاريخ الأسود 27 ديسمبر و قت المواطنين الكل حلوا التلفزة باش يطيروا ستراس جمعة كاملة و إلي عندها مسلسل تركي باش تنسى بيه بلادة راجلها إلي أخلاقو ديما فاسدة و خليقتو ما جات شي - مش عارف علاش خذاتو كي هو ما شبه لشي - و إلي عندو ماتش كورة يستنى فيه و إلخ. المهم نهار 27 ديسمبر جاتنا صدمة كبيرة كي قرينا في الأخبار العاجلة أنو هاك الشيطان إلي إسمو جيش إسرائيل عمل في أبرياء غزة كيما حبت شريعة الغابة و اشتهات و ما نكذبش عليكم كي نقول كنت نظن ضربة غزة فرصة هايلة - مانيش متشمت - باش تفيق العرب على رواحها و كان ما وحدهمش الدين و الإنتماء و الكورة تو توحدهم غزة، محسوب دمنا واحد و إلي يدق عربي في الشرق يدق خوه إلي في الغرب و مشات الأيامات و تعدات و العرب ما عملوا كان قمة عربية ساذجة و كل واحد استعرض عضلاتو اللغوية و طلع روحو بريء من الحكاية جملة و تفصيلا و من بعد قمة كويت قلت الله يرحم العرب و يعمبو إلي يحب يفيقهم من نومهم و زيد عمنا شافيز و أردوغان ما خلاو في وجوهنا ما يتشاف و لكن الحمد لله هاو مازلنا عايشين كي النعام - سامحوني كان شبهت العرب بالنعام على حاطر النعام لحمو غالي و أحنا لحمنا مازال رخيص - و لكن عنا مزية كبرى مازلنا محتفظين بيها و لله الحمد و هي مزية التخوين و بدينا عاد نفتيوا و شي يقول معركة غزة هي غضب رباني على خاطر السنة لتو ما طهروا الأرض من هاك الشيعة و السنة يتضاحكوا على الشيعة و على حسن نصر الله إلي يفكروا فيه ديما أنو من الروافض و لو نصر الله يحرر القدس تأكدو راهو باش يقعد مكروه و من ناحية أخرة حتى الشيعة طلع عندهم ما يقولوا و بداو يفتيوا و قالوا كيفاش ربي ينصر جماعة سنة كفار و فاسقين و ما يستاهلوش و بدات المباراة بين السنة و الشيعة و شي يقول المهدي المنتظر هاو في الثنية و لازمو يكون سني و شي يقول يزي بلا لعب المهدي المنتظر راهو شيعي و راهو في نفس الوقت هاك الرئيس أوباما إلي طفاهم و قال مانيش مسلم و هوما يحبوه مسلم بالصيف. توة نجيوا لبيت القصيد و نفهمكم فاش كنت نخرف من بكري، إلي يقصدو خوكم النسر هو وقتاش ننساو حكاية الطائفية المنتنة و نحيوا من مخاخنا حكاية أنا شيعي و طز في البقية و أنا سني و لا ترحم البقية. وقتاش يجي النهار إلي يولي فيه الدين حاجة خاصة بين العبد و مولاه و مش لازم إلي يصلي الصبح يفكرنا أنو يصلي و إلي صايم مش لازم يصوم و يشيحلنا ريقنا و يفكرنا أنو صايم و إلي يحب يكون سني مرحبا بيه و مش لازم ينكد ع البقية ويبدا يتقبح و يقول أنو الوحيد في الجنة و حتى الشيعي نوجهلو نفس النداء و نقللوا يرحم والديك مش لازم تفتي وحدك و أنك الوحيد في الجنة و الله لا يكون في الباقي و نتوجه بنفس النداء للسنة و الشيعة و نقللهم فاش قام ها القروبات في الفيس بووك متاع فضايحنا و قال شنوة تحدي باش نجمعوا 100000000 مواطن باش يسب الشيعة. يعيشكم انضبطوا و تفكروا راهي الدنيا أيامات و ماهي دايمة لحتى بشر و تفكروا ربي آش قال ( و تلك الأيام نداولها بين الناس ) و في عوض ما تقولوا السنة أولى بفلسطين و الشيعة أولى بيها تفكروا إلي ربي ينجم يبعث ناس لاهم سنة ولا شيعة و يحرروا فلسطين و انتوما تتفرج و مانيش قاعد نفتي على خاطر الآية واضحة ( نداولها بين الناس ) و ربي يهدي و يحنن قلوبنا على بعضها