jeudi 5 février 2009

مازالت النية

السلام عليكم يا جماعة. أولا ما نحبكمش تقولوا اشبيه هالنسر خرنان و يعاود في الكلام أما اليوم حبيت نكتب في موضوع معاود حكاوا عليه ناس من قبلي و لكن يظهرلي إلي كلامهم مش قاعد يوصل و كيما نعرفوا أحنا معشر التوانسة إلي ما يسمعش لازمنا نهمزوه ثماشي ما يفيق و يتلفتلنا. من غير ما نطول عليكم أما نقوللكم راهو خوكم النسر سبوه و بخسوه - مش بالحق راهو - أما ما تتسبلهوهش و تحسبوه فرخ صغير ترقدو حكاية قبل النوم. الحكاية هي مع جماعة الإيميلات الساذجة متاع أنشرها 11 أو 13 مرة و تو تشوف ألس في بلاد العجائب أو تو تشوف العجب و الطامة الكبرى هي أنو ثمة شباب في ربيع العمر قاعد يصدق في هالخرافات و نزيدكم زيادة قاعد يدافع عليها قال شنوة النية تعيش و اللهم لا عيش إلا عيش السبهللا. توة مش عيب يجيوا شرذمة جهال و يبداوا يلحنوا و يفصلو و يقيسوا على كيف شيطانهم و يقولوا هاو مرة النبي محمد عليه الصلاة و سلم جاهم في المنام - حاشاه بالطبيعة - و قاللهم راهي القيامة قريبة و مرة داوى برشة ناس مرضى و مرة جات السيدة عايشة و داوات طفلة عمرها 12 عام و قالتلها أبعث الرؤيا هاذي 12 مرة و تو تنجح من أول ضربة و كان لزم تو تلقى فاتورة الضو خالصة و صاحب فكرة منام السيدة عايشة ياسر مهف و يعطيه الصحة و قالك مادام سيدنا النبي يجي للرجال في المنام مالا لازم تجي مرتو للنسا في المنام و يا ربي عافينا من شر الإختلاط. بيت القصيد يا جماعة و يا سيادي المثقفين نطلب منكم طلب بسيط و هو أنو كل واحد منا لازمو يتطوع و لو للحظات باش يثقف الناس هاذوما متاع عصابة - أنشر تؤجر - و يقوللهم احشموا على رواحكم و عيشوا الحياة ببساطة و خوذوا بالأسباب و اقراو على رواحكم و إن شاء الله طلبي هذا ما يمشيش بلاش على خاطر عنا رجال تعليم في البلوغ و ينجموا يخصصوا لحظات للأجيال الصاعدة و يفسرولهم قيمة العلم في الحياة و أنو نظرية ( أعمل روحك بهلول تعيش ما عادش توكل كسرى ) و ربي يهدي

خاطرة خرافية
يحكيوا على مواطن ياسر عاقل و متربي حتى كثر على ما وصووه و قعد ضحكة في المجتمع من الحومة لمحطة الكيران للكلية متاعو، و سي خونا المتربي قرر مرة باش يفسد و بدا يلوج ع الحلول العملية و النظريات التجريبية الصادقة لدخول عالم الفساد من أوسع أبوابو و بينما هو يفكر غلبو النوم و جاه أبو الفساد في المنام و أعطاه أمانة كبيرة عبارة على مفتاح مصدد منقوش عليه - لا إلاه إلا الله ، أبو الفساد عدو الله - باش سي العاقل يحل بيبان الفساد و يدخل في هاك العالم المشوم و شاف روحو في مدينة الرذائل و دخل بساقو اليسار و بينما سي العاقل ماشي جاه سي أبو الفساد و قللوا " يعيش ولدي هالمنامة هاذي أمانة في رقبتك و لازمك تبعثها 12 مرة للي تعرفهم و ما تعرفهمش و كان تنسى ما تبعثهمش تو كل شي يطيح في الماء و ترجع لعقوليتك و تمانيك الناس عليك و ما تنساش باش تكتب 12 مرة ( لا إلاه إلا الله، الفاسد عدو الله ). المهم الرسالة تبعثت و طاحت في يدين واحد سارق و نساها لين تاب عليه ربي في أربعة سوايع و رجع الفلوس لأصحابها و طاحت في يدين واحد زبراط و نساها لين تاب عليه ربي و السواك ماعادش يفارق فمو و نفس الرسالة بعثها واحد صادق و في لحظات ولى واحد بلعوط كبير و مش بعيد يجيبوه في التلفزة باش يدافع عن إهمال البلدية و واحد آخر متربي بعث الرسالة و ولى مش متربي. المهم قعدت هاك الرسالة تدور من بوات إيميل لأخرى و الناس تبعث فيها فرحانة و كيما نقولوا في الإنشاء متاع اللإبتدائي ( وعاد فرحا مسرورا ). و ربي يهدي

6 commentaires:

  1. :)))))))
    ربي يهديك توا اش بش نعمل مادام قريت خاطرة الفساد؟ نبعثها ولا ربي يهديني"؟

    RépondreSupprimer
  2. زعمة توه فوق الألف عام موش ناوي يهدي،

    توه باش يحن عليهم؟
    :))))

    RépondreSupprimer
  3. السلام عليكم يا جماعة. أختي بنت عايلة توة حصل ما في الصدور و قريت خاطرة الفساد و لازمك ما تبعثهاش باش تعقال
    عم عاشور مرحبا بيك. يا خويا ثمة آية الناس الكل حافظينها شربة ماء و لو أنو هي جزء من آية أما لازمنا نقولوها و هي ( إن الله لا يغير ما بقوم حتى يغيروا ما بأنفسهم ) و زايد كان ربي باش يصلح أحوالنا و أحنا مصححين ريوسنا و عايشين ع النية كيما قالوا ناس بكري. ربي يهدي

    RépondreSupprimer
  4. لوريقات هاذم اللى نعرفوهم من مدة طويلة موش ممكن يكتبهم واحد متعلم ومتثقف...وكيف كيف موش ممكن يكونو كتيبة واحد جاهل ..لانو يلزمهم برشه خباثة ...مواضيعهم مستحيل تكون مختارة عشوائيا..بل هى مدروسة بدقة وان كانت تميل للسذاجة...عمدا...والظاهرة هاذية منتشرة من سويسرا الى السويد الى الصومال حتى بنغلاداش...هل هى بريئة...العبدولله مانتوقعش...ديما يبقى عندى يقين انها مصنوعة ومعدة للتسويق...اشكون ومتى وأين...ذاك موضوع يطول شرحه

    RépondreSupprimer
  5. أهلا بالأخ أبو العربي. صدقني كلامك منطقي و ممكن هالإيميلات و الوريقات البريئة ثمة ذيوبة واقفة عليها باش ينسيوا الناس في العقيدة الصحيحة. صدقني كي يجني إيميل من أي صاحب لازمني نسمي بسم الله و نخاف ع الدم لا يطلعلي لراسي من هاك السذاجة و المصاطة. ربي يهدي

    RépondreSupprimer