samedi 21 février 2009

فرشان الحصاير

السلام عليكم يا جماعة الخير. بصراحة رات عيني ما رات و ما راتشي رقع كيما هالمجتمع إلي عايشين فيه و هو باختصار مجتمع يغطي ع الخير و بللي الواحد يجري و يجري يبقى مكروه و الناس مش مهضمينو بلغة القازوز و زيد الخير الكل يبقى محقور و لكن يا دوب وخينا يعمل غلطة بسيطة تو تشوف العباد كيفاش تتعامل معاه. أولا الفضيحة و مهما تستر على فلان لازم يجي علان و يفضحو و ثانيا بقدر ما تكون الغلطة تافهة قد ما تكون الفضيحة أكبر على خاطر إلي يغلط غلطة كبيرة و يطيح فم واحد - حاشاكم - هذاكة سيد الرجال و صيد من ظهر و آه يا زوالي يا مسكين كان تغلط وسط الذيوبة. لتو مانيش فاهم هالمجتمع و صدقوني راني نحب واحد عاقل و رزين يفسرلي تفسير علمي لظاهرة الفضايح و الشمايت بصيفة خاصة

2 commentaires:

  1. فكرنا فيها الدوعاجي ماعندوش برشى : "إذا لقيت أعمى زيد كِبّوا...... ماكش باش تطلع أرحم من ربّو"

    RépondreSupprimer
  2. أهلا بعم الغول و شكرا على تعليقك و لكن المشكلة مش في الأعمى أو في رب الأعمى و لكن المشكلة في كون الأعمى يكشفلنا نوايانا و إلي يحب الخير يعملو مع الأعمى قبل ما يعملوا مع الصحاح إلي تلقاه طامع فيهم

    RépondreSupprimer