mercredi 4 février 2009

علاش كي نكذبوا نصدقوا رواحنا؟

السلام عليكم يا أهل الخير. أولا نحب ننوه أنو كي نكتب على غزة الأسيرة مانيش متشمت معاذ الله و لكن نكتب عليها حسب ما فهمتو كمواطن عربي شابع بالكفوف و حامد ربي. الحاصل من غير تكعرير نقول أنو اكتشفت وجود ورم قديم و متجدد و قاعد يكبر في أمتنا العربية و هو ورم الكذب، و صحيح معظم العرب بما فيهم آني مرضى بالكذب أما في الأيامات هاذي كثرنا على ما وصوونا و نبداو من إنتهاء القصف الإسرائيلي الظالم على غزة و إلي يا دوبك وفى منا و الأخت حماس قالت انتصرنا. بالله كيفاش انتصرنا و أحنا مات منا 1330 مواطن بخلاف الجرحى إلي ما يتعدوش من كثرتهم و زيد أضرار القنابل الفسفورية و في المقابل إسرائيل ما مات منها كان 80 مواطن على أقصى تقدير. علاش نكذبوا و نقولوا انتصرنا و علاش ما نعترفوش بالهزيمة ياخي ال1330 قتيل و 5000 جريح ماهمش ناس كيفنا و إلا كيفاش صارت الحكاية، راهي الهزيمة مش عار على خاطرها تنجم تكون درس لينا باش نعاودوا حساباتنا و نفيقوا أنو عدوتنا إسرائيل عندها عتاد حربي اكتسبتوا بالحلال و الحرام و أحنا مازلنا نمجدوا في فوشيك القسام و المقاومة الحقيقية هي مقاومة أهالي غزة و مش مقاومة حماس المتخبية في المغاغر. علاش نكذبوا على رواحنا و نقولوا أنو الرسول الكريم لبس لباس الحرب و ماشي لغزة و في الأخير ثمة 90 بالمية إحتمال أنها كذبة و لكن نصدقوها. علاش نكذبوا و نبعثوا إيميلات لبعضنا باش نعاودوا شوية محفوظات خرافية عشرة مرات و سبحانك يا ربي تو كل شي يتحل و لتو ما صار شي و عاودنا الإيميلات آلاف المرات و زدنا وخرنا لتالي. ثماشي إنسان عاقل يفسرلي علاش كي نكذبوا نصدقوا رواحنا و تلقانا فرحانين بأحوالنا إلي ماشية و تتراجع و إلا نطلعوشي كيما هاك العزوزة إلي هاززها الواد و تزغرد و تقول العام صابة. أفيدوني يفيدكم ربي

6 commentaires:

  1. علاه وقتاه العرب خسروا حرب مع اسرائيل وسماوها هزيمة؟
    هاو نكبة هاو نكسة هاو توا ف الفين وتسعة ولا اسمو نصر جملة وحدة...
    خللي عزاها سكات خير ما واحد يشعل في روحو فتيل

    RépondreSupprimer
  2. في الأخير ثمة 90 بالمية إحتمال أنها كذبة
    ma3nitha fama 10% kawnha tkoun s7i7a?? lokan fama 0,0001% kawnha tkoun s7i7a el7keya rani sadi9tha :-))
    7roub alt7rir mahich 7roub mabin zouz dowel ! we ila taw n9olo ili almo9awma fi aljza2ir inhezmit ba3tibar anha 5sret akther min 1,000000 chahid!! w nafs alchy fi vitnam ,we fi janoub lobnan!
    alintisar howa intisar ma3nawi w madi aydan..ma3lik ken tchouf ahdef almo3lana fi awel al7arib we fi a5ir al7arib..

    RépondreSupprimer
  3. كيما قال أرتيكيلي، على حساب هكا الجزائريين و كل الشعوب إلي قاومو الإحتلال خسرو، إبداهم من تونس، مثلا حرب بنزرت كانت كارثة، لكن كان فيها إنتصارات سياسية و إستراتجية

    حرب سبعة و ستين هي حرب كلاسيكية، لكن إلي صار من بعدها يتسمّى حرب عصابات

    RépondreSupprimer
  4. يا سفيان ماهياش قضية مقارنة مع الجزائر و إلا حرب بنزرت. لازمنا نفهمو إللي الوضع في فلسطين معقّد. قبل فرنسا كانت محتلة دول و لكن فرنسا موجودة. معناها الفرنساوي كي خرج من توس و بنزرت و الجزائر و غيرهم، رجع لبلادو، لفرنسا. في القضية الفلسطينية، عنا زوز من الناس يطالبو بنفس الأرض. و الموضوع شائك، على خاطر الزوز سبق و إنهم عاشوا فيها لفترة. تقللي كل يهودي يرجع منين جاء، انقوللك هالكلام كان صحيح في 48 و من بعد، أما اليوم عنا على الأقل زوز أجيال إذا مش أكثر ما يعرفو كان إسرائيل: تولدوا و يعيشوا غادي و فيهم حتى شكون مات. بالتالي ولاّ صعيب برشا باش تقوللهم هيا أخرجوا و حتى كان خرجوا وين باش يمشيوا؟

    المشكل مش في الحرب، و لكن المشكل إنو أحنا ديما نعلنوا أنفسنا منتصرين. في 2006 حسن نصرالله قال اللي هو انتصر و كي تغزر للبلاد تلقاها ادّمرت و رجعت 20 سنة لتالي. و في 2009 حماس زادة انتصرت و غزة تعيش في القرون الوسطى.

    سبق و كتبت مقال وضّحت فيه علاش ما انجموش انقولو اللي إسرائيل ربحت و إلا خسرت و كيف كيف مع حزب الله و حماس. على خاطر ماعنّاش جيوش تتعارك في ساحة المعركة و فمة أهداف واضحة.

    RépondreSupprimer
  5. أهلا بالأحباب الكل و مرحبا بيكم في صفحتي. يا جماعة و يا سي أرتكلير و سي سفيان خونا ليجند فسر المقصد خير مني و زيد راهو أهل غزة مش فيران تجارب باش نرميوا فوشيكة على إسرائيل و باش هي تكور بالأبرياء و تقتلهم بلا شفقة و رحمة و زيد بأسحلة محرمة دوليا. إلي نحب نوصلوا أنو أعز مثل للمقاومة كي تتوحد جميع الفصائل الفلسطينية و ننساو خلافات حماس و فتح و نكونوا جيش قوي قادر باش يواحه شبح الموت الغاشم. توة مش صلاح الدين الأيوبي خذا بالأسباب و حضر جيش و استعان بالكيمياء باش غلب الصليبيين و نزيدو زيادة كلام سي ليجند معقول و توة كي تخرج إسرائيلي من فلسطين آش تحب تعمل كي يحب يشم الريحة و يزور قبر والديه. بصراحة آني لاني صهيوني و لا عميل و لا هم يحزنون و لكن كان ثمة مبادرة سلام باش الأديان و اللاأديان تعيش في سلام نقول مرحبا و كان باش يفددونا في حياتنا بلاش بيه ها السلام إلي باش يذلونا بيه. نسيت حاجة باش نقولها لخونا أرتكلير و هي هاك العشرة بالمائة إحتمال حطيتها تضامنا مع أهل الخرافات على خاطر ما ثماش إصلاح يجي بين عشية و ضحاها

    RépondreSupprimer
  6. ههههه عجبتني حكاية الفوشيكا. والله عندك حق. أما وينو اللي يفهم؟ ديما يغزرولنا على أساس إنو أحنا عملاء و خونة و مانا فاهمين من القضية حتى شيء. مصلّي عالنبي عليهم...هوما الي فاهمين كل شيء و مافهمتش أعلاش كيما هوما فاهمين كل شيء ما يجيبولناش الصّيد من ******؟

    RépondreSupprimer